راميز روشنين بو گوزل شعرين اينديرين:

ايندير >> آيريليق - راميز روشن
-----------------------------------------
يئنه بو شهرده اوز–اوزه گلديك
نئيله‌يك، آيريجا شهريميز يوخ
بلكه ده، بيز خوشبخت اولا بيله‌رديك،
بلكه ده، خوشبختيك، خبريميز يوخ!
آرادان نه قدر ايل كئچيب گؤرن؟!
تانييا بيلمه‌ديم، مني باغيشلا!
من ائله بيليرديم، سنسيز اؤله‌رم،
من سنسيز اؤلمه‌ديم، مني باغيشلا!
«اؤلمه‌ديم» دئييرم، نه بيليم آخي...
بلكه ده، من سنسيز اؤلموشم ائله،
قبيرسيز- كفن‌سيز اؤلموشم ائله.
بلكه ده، بيز اوندا آيريلماسايديق،
نه من اينديكييديم، نه سن اينديكي.
آيريلديق، شئيطاني گولدوردوك اوندا.
بو ايلين، بو آيين، بو گونونده‌كي،
ائله بو كوچه‌نين بو تينين‌ده‌كي،
مني ده، سني ده اؤلدوردوك اوندا.
ساغيميز–سولوموز آداملا دولو،
قول–قولا كيشيلر، قادينلار كئچير،
اؤزوندن خبرسيز عؤمرونده مين يول،
اؤزونو اؤلدوره‌ن آداملار كئچير.
كئچير اؤز قانينا باتان آداملار،
بيرده كي، قان هاني؟
قان آخي يوخدو...
هامي گوناهكاردي دونيادا، آمما
دونيادا هئچ كسين گوناهي يوخدو!
بيزسيز يازيلميشدي بو طالع، بو باخت،
ساپانددان آتيلان بير جوت داشيق بيز.
بلكه بو دونيادا اون–اون‌بئش ايل يوخ،
مين ايل بوندان قاباق آيريلميشيق بيز!
حالال يولوموزو ديشيب، نه‌سه،
چاشميشيق، بيز اؤزگه يولدان گئتميشيك.
بلكه مين ايل قاباق سهو دوشوب نه‌سه،
مين ايلليك بير سهوه قوربان گئتميشيك!
دييشيب يئريني بلكه قيش، باهار،
قاريشيب دونيانين شهري، كندي.
بلكه اؤز بطنينده اؤگئي آنالار،
اؤگئي بالالاري گزديرير ايندي.
عؤمروم باشدان–باشا يالاندي بلكه،
طالعيم باشقايميش دوغرودان ائله.
او يولدان اؤته‌ن قيز آنامدي بلكه،
بلكه ده، اوغلومدو بو اوغلان ائله.
بو يالان عؤمرومده گؤرن سن نه‌سن؟
بلكه هئچ سئوگيليم دئييلسن منيم،
آنامسان، باجيمسان، ننه‌مسن، نه‌سن؟
بيرجه آلله بيلير نَييمسن منيم.
بيزي كيم آددادار بو آيريليقدان؟
چاتماز داديميزا نه يول، نه كؤرپو.
اؤلوسن، ديريسن، هرنه‌سن دايان!
دايان هئچ اولماسا اليندن اؤپوم...
دئييرسن: «اؤلويم، اؤلونو اؤپمه...»
اليمين ايچينده سويويور الين،
دئييرسن: «سن آلله، اليمي اؤپمه،
اليمدن دئيه‌سن قان اييي گلير...»

راميز روشن